Skipulagsfræðingafélag Íslands

Skipulagsfræðingafélagi Íslands er ánægja að kynna málþing um skipulagsmál sem mun fara fram á Keldnaholti þann 8. desember næstkomandi. Þar munu þrír fyrirlesara fjalla um skipulagsmál út frá tíma og rými og verður fróðlegt að heyra hvað þeir hafa að segja.

Nánari upplýsingar má sjá  hér.

Ritari

Í tilefni af alþjóðlega skipulagsdeginum, 8. nóvember, efndi Skipulagsfræðingafélag Íslands til hádegisfundar um skipulagsmál.

Á fundinum sem haldin var í Þjóðarbókhlöðunni voru flutt tvö erindi.

Annað hét “Veðjað á vöxt”, var flutt af Ásdísi Hlökk Teódórsdóttir og greindi hún þar frá verkefni sem hún og Salvör Jónsdóttir o.fl. hafa unnið að á síðustu misserum.

Í erindinu kom Ásdís inn á mismuninn milli framboðs á íbúðum og fjölgun íbúa. Mannfjöldaspár þær sem sveitarfélögin á áhrifasvæði höfuðborgarinnar byggðu aðalskipulög sín á í árunum fyrir hrun virðast margar hverjar ekki hafa verið í tengslum við raunveruleikann eða mannfjöldaspá Hagstofu. Ásdís tók sérstaklega fyrir sveitarfélögin á útjaðri borgarinnar þar sem nokkuð hefur verið um að stór landsvæði hafi verið skipulögð með áherslu á dreifða byggð, svokallaða búgarðarbyggð, og ræddi um hvaða skipulagsvandamál slík byggð hefur í för með sér. Gaman verður að rýna í verkefnisskýrsluna sem kemur út í kringum áramót.

Hitt erindið hét “Skipulagsmistök á höfuðborgarsvæðinu-Niðurstöður viðhorfskönnunar” og var flutt af Agli Þórarinssyni meistaranema í skipulagsfræðum við Landbúnaðarháskóla Íslands.

Egill fór í sínu erindi yfir könnun sem hann gerði í vor varðandi skipulagsslys/framkvæmdir. Þar ræddi hann um að deila megi um hvort hugtakið ”skipulagsslys” eigi rétt á sér vegna þess að  slys  gera ekki boð á undan sér en það gera skipulagsáætlanir. Vonandi heldur Egill áfram með þetta verkefnið því það velti upp hugmyndum um ábyrgð, siðferði, völd, hagsmuni og lýðræði í skipulagi.

Fundurinn var vel sóttur, um 60 manns mættu og spunnust áhugaverðar umræður um bæði erindin.

Ritari