Vogabyggð hlýtur Skipulagsverðlaunin 2016

Vogabyggð – svæði 2 hlaut Skipulagsverðlaunin 2016 sem afhend voru þann 14. febrúar 2017 í Hannesarholti. Deiliskipulagið er unnin af Teiknistofunni Tröð, Jaakko van’t Spijker (Hollandi) og Felixx (Hollandi).


Deiliskipulagið er nær yfir iðnaðarsvæði í Vogahverfi, Reykjavík, sem á að umbreytta í íbúðar- og þjónustusvæði. Að mati dómnefndar er tillagan góð lausn sem setur fram spennandi og nútímalega borgarsýn en leysir einnig vel úr töluverðu flækjustigi. Þétt fjölbreytt byggð þar sem gert er ráð fyrir öllum ferðamátum og almenningssvæðum er gert hátt undir höfði. Gott samspil er á milli núverandi mannvirkja á svæðinu og nýrrar byggðar. Vel er hugað að staðaranda og náttúru auk þess að nærumhverfi Elliðaánna er nálgast á varfærinn en skapandi hátt. Lesa meira

Skipulagsverðlaunin 2016 – ósk um tilnefningar

skipulagsverdlaunin

Skipulagsverðlaunin eru veitt annað hvert ár til sveitarfélaga, stofnana eða einkaaðila sem hafa gert vel á sviði skipulagsmála og lagt sitt af mörkum til að bæta og fegra umhverfi í þéttbýli eða dreifbýli með faglegri skipulagsgerð.

Markmið verðlaunanna er að hvetja til umræðu, auka skilning á skipulagsmálum og vekja athygli á því besta sem er að gerast á sviði skipulags á hverjum tíma.

Í ár verður áhersla lögð á endurnýjun svæða. Leitað er eftir skipulagsgerð þar sem unnið er með breytta landnotkun og/eða nýtingu og/eða starfsemi á þegar byggðu svæði. Við mat á tillögum verður litið til þess hvernig faglega unnin skipulagsgerð getur styrkt staðaranda, nærumhverfi og samfélög.

Engin takmörk eru sett á stærð svæðis/lóðar né umfangi breytinga.

Skipulagsverðlaunin eru annars vegar veitt fyrir skipulag, þ.e. skipulagstillögu eða staðfest skipulag og hins vegar fyrir sérstök og afmörkuð verkefni í tengslum við skipulag, svo sem frumkvöðlastarf og nýbreytni eða miðlun upplýsinga um skipulagsmál, svo eitthvað sé nefnt.

Tilnefningar mega koma frá sveitarfélögum, stofnunum, fyrirtækjum eða einstaklingum. Ekki er nauðsynlegt að höfundar tilnefni verk sín sjálfir.

Skipulagsverkefni á öllum skipulagsstigum eru gjaldgeng til skipulagsverðlaunanna.

Tilnefningar til Skipulagsverðlaunanna 2016 ásamt viðeigandi gögnum t.d. uppdráttum og greinargerð ásamt rökstuðningi skal senda á netfangið skipulagsfraedi@gmail.com eigi síður en 28. nóvember 2016. Gögn skulu vera á pdf formi.

Þátttaka er öllum heimil.

Ný stjórn og formaður SFFÍ

Ný stjórn SFFÍ ásamt fráfarndi stjórnarmeðlimum

Ný stjórn SFFÍ ásamt fráfarandi stjórnarmeðlimum. Efri röð frá v.: Erla Margrét, Jón Kjartan, Sindri, Brynja Dögg, Ragnar, Guðrún Dóra og Gunnar.

Aðalfundur SFFÍ 2016 fór fram þann 25. frebrúar s.l. Á undan hefðbundnum aðalfundi voru flutt þrú ólík erindi um skipulagsmál, skipulagsfræði og hlutverk skipulagsfræðinga. Sköpuðust umræður um málefnin í kjölfarið og ýmsar góðar ábendingar komu fram til nýrrar stjórnar.

Fráfarandi stjórn vill þakka frummælendum kærlega fyrir sín innlegg.

Að loknum umræðum fór fram hefðbundinn aðalfundur þar sem ársreikningur var samþykktur, óbreytt félagsgjöld voru samþykkt og ný stjórn kjörin. Þá var nýr formaður félagsins valinn en það er Gunnar Ágústsson. Gunnar hefur verið í stjórn félagsins frá 2014.

Erla Margrét Gunnarsdóttir og Jón Kjartan Ágústsson gengu úr stjórn félagsins og nýjir stórnarmeðlimir eru Sindri Birgisson og Brynja Dögg Ingólfsdóttir.

Aðalfundur 2016 – dagskrá

Stjórn Skipulagsfræðingafélags Íslands boðar til aðalfundar fimmtudaginn 25. febrúar nk. kl. 15:00-18:00. Fundurinn verður haldinn í Hannesarholti, Grundarstíg 10. Kaffi og léttar veitingar verða í boði. Fundurinn hefst tímanlega á slaginu 15:00.

Áður en aðalfundur hefst verða flutt þrjú erindi um skipulagsmál og í framhaldi verður stutt vinnustofa þar sem félagsmenn geta skrifað niður hugmyndir og stefnumótun fyrir félagið og nýja stjórn.
adalfundur2016.dagskra