Málþing Kynjaborgin Reykjavík – Kynleg borg

Rannsóknastofa í kvenna- og kynjafræðum við Háskóla Íslands og Reykjavíkurborg efna til málþings laugardaginn 29. okt. kl. 11.00-14.00 í Listasafni Reykjavíkur – Hafnarhúsinu um kynjaborgina Reykjavík.

Erindi flytja Gerður Róbertsdóttir sagnfræðingur, Katrín Jakobsdóttir bókmenntafræðingur, Salvör Jónsdóttir forstöðumaður skipulagssviðs Reykjavíkurborgar, Heiða Jóhannsdóttir kvikmyndafræðingur, Guðbjörg Linda Rafnsdóttir félagsfræðingur og Harpa Björnsdóttir myndlistarkona.
Ljóðskáldin Ingibjörg Haraldsdóttir og Sigubjörg Þrastardóttir flytja ljóð og Magga Stína og félagar flytja tónlist.

Á þessu ári hefur verið haldið upp á fjölmarga viðburði í sögu íslenskra kvenna. Nú síðast var þess minnst að 30 ár eru liðin frá kvennafrídeginum
1975 sem markaði tímamót í jafnréttisbaráttu kvenna á Íslandi. Reykjavík hefur komið mikið við sögu íslenskrar kvennabaráttu allt frá því að fyrsta kvenfélag borgarinnar Thorvaldsensfélagið var stofnað fyrir 130 árum.
Kvennaframboð, söfnun fyrir landspítala og kvennadeild sama spítala sem og margvíslegar aðgerðir kvenna í rúmlega heila öld hafa sett svip sinn á borgina. Konur hafa lengst af verið meirihluti borgarbúa og lagt mikið af mörkum til atvinnulífs, menningar, félagslífs og þróunar borgarinnar.
Fjallað verður um stiklur í sögu kvenna í borginni, rýnt í tölur um félagslega stöðu, skipulagsmál skoðuð út frá kenningum feminista og kannað hvernig lif kvenna speglast í bókmenntum, kvikmyndum og myndlist.

SJÁ DAGSKRÁ >> http://www2.hi.is/page/kr-dagskra

Allir eru velkomnir og aðgangur er ókeypis.

Kveðja,
Rannsóknastofa í kvenna- og kynjafræðum, RIKK.
www.rikk.hi.is