Sjálfbært skipulag – málþing

Þann 25. apríl nk. verður haldið málþing á vegum Umhverfis- og byggingarverkfræðideildar HÍ um sjálfbært skipulag. Í vetur hafa kennarar í fjórum námsskeiðum við deildina látið stúdenta gera tillögur í sjálfbærum anda um ýmsa þætti skipulags Háskólasvæðisins.

Kreppan þrýstir á um sjálfbærnihugsun því fólk hefur minni tekjur og bensínverð hefur hækkað. Margir veigra sig því við löngum akstursleiðum, t.d. frá úthverfunum, og vilja frekar búa miðlægt. Til að geta dregið úr akstri og mætt óskinni um að búa miðlægt þarf að stefna að skipulagi sem eykur þéttleika í eldri hluta Reykjavíkur og leyfa meiri blöndun, t.d. með byggingu íbúðarhúsnæðis nálægt stórum vinnustöðum, eins og t.d. á Háskólasvæðinu. Þetta mundi minnka bílaumferð á Hringbraut og innan svæðins, fækka bílastæðum og spara fólki tíma.

Háskólasvæðið er í dag mjög dreift og bíllinn hefur verið í forgrunni. Miðlæg starfsemi er oft úti í hornum á svæðinu, eins og t.d. Háskólabókasafnið, en bílastæði í miðjunni. Þetta þýðir langar vegalengdir milli bygginga. Á málþinginu verður einnig sagt frá verðlaunatillögum um friðlandið við Norræna húsið. Einnig verður kynnt sjálfbært regnvatnsskipulag, sem fellst í að skilja ofanvatn frá skólpi og nýta það og hreinsa staðbundið.

Málþingið verður haldið 25. apríl nk. í stofu 132 í Öskju frá 15-17.
Umræður og fyrirspurnir. Kaffiveitingar. Aðgangur ókeypis.
Málþingsstjóri: Guðmundur Freyr Úlfarsson, prófessor.

Fyrirlesarar og heiti fyrirlestra:

Trausti Valsson, prófessor: Sjálfbært borgarskipulag – Dæmi Háskólasvæðið.

Björn Axelsson, Umhverfisstjóri Skipulagssviðs Rvk: Stefna Reykjavíkur um sjálbært borgarskipulag.

Katrín Halldórsdóttir, umhverfisverkfræðingur: Tillögur sjö hópa um sjálfbært skipulag á Háskólasvæðinu.

Rúnar Bjarnason, umhverfisfræðingur hjá Mannviti: Beiting aðferðafræði Umhverfismats áætlana á skipulag Háskólasvæðisins.

Björn Marteinsson, dósent: Vistvænar byggingar.

Inga Rut Gylfadóttir, formaður FÍLA: Verðlaunatillögurnar um friðlandið við Norræna húsið.

Hrund Andradóttir, dósent: Sjálfbær regnvatnsstjórnun.